Deutschland
Postleitzahl: 85 290
Vorwahl: 0 84 52

Veranstaltungen
Geisenfeld-Online


Kommunalpolitiker "sauber derbleckt"

Fastenrede von "Bruder Barnabas" alias Sepp Meyer

Fotos von Hugo Zachas

Grüaß euch Gott mitnand, liabe Salvatorgemeinde,
des starken Paulaners treue Freunde.
Es is a wieder heuer recht angenehm
in da Helmut-Königer-Hall in Nottingham..
Des Starkbierfest vo unsrer FW
werd a heuer ganz gwiß wieder schö.
Da Zuaspruch is groß, des wissts ja scho,
so dass de Halle a leicht voiwern ko.
Ois Fastnprediger bin i wieder engagiert
und hoff, dass euch mei Red a weng amüsiert.

Es gibt wieder etliche nette Gschichtn,
de i zu euerm Vognügn konn berichtn,
denn do braucht ma uns gor nix vormacha,
über a Missgschick vo andare komma oiwei lacha.
Ober a d Stodtpolitik muaß i scho erwähna
und vielleicht ara a poor wunde Punkte nenna.
Sie warn ja oisam wirkle schö,
de Wahlversprechn vo da USB.

Und da Burgermoasta bemüht se, komma hörn,
dass de a sukzessive Wahrheit wern.
An Bürgerbus und s Bürgerbüro
de hamma ja inzwischn scho.
Do waar d Freud drüber jatz groß und ganz,
ober es feiht hoit a weng an da Resonanz.
Grod aso is a mit da INVG.
Ois hot plärrt: "Mir braucha de !"

Jatz hammas, da Fahrplan is komplett,
doch leider fohrt hoit neamand mit.
Und de gleichn Leut spöttln jatz zum Schluss
ganz ungeniert übern de Geisnfelder Geisterbus.
Wemma scho wos fordert, ja so moan i hoit,
dass mas danoch na a kräftig nutzn soit.
Liabe Geisnfelder, lassts eure Autos steh
und fohrts a d Stodt künftig mit da INVG.

Wos ma in Geisnfeld bis dato no net hot kennt:
Jatz hamma ara Jugndparlament !
Mit große Erwartunga is des gstart,
ober olle Wünsche erfein, werd sicher hart,
weil de junga Leut ois mögliche woin,
ober koana sagt, wer soi des zoihn !

Wemma de Wünsche oisam realisiert,
braucht ma an großn Geldbeitl garantiert.
An Mac Donalds kannt ma ja errichtn lassn,
der waar koa Problem für unsare städtischn Kassn;
so ähnlich wia d Stadthalle, moan i fast,
de steht jatz z Pinat und hot da Stodt nix kost.

Do finden de größern Festivitätn statt,
und für kleanare Sachan, so moan i glatt,
is unser Rathaus doch prädestiniert,
des werd zum Kulturtempe umfunktioniert.
Konzerte und Vernisagn gibt's do drinn,
des san scho Highlights, wia i finn.
Ma konn im Sitzungssaal seit Neuerm
jatz a scho runde Geburtstog feiern.
Da Burgermoasta hots bewiesn gwiß,
dass der Raum dafür bestns geeignet is.
Wemma den künftig für sowos vomietn tuat,
taat des am Stadtsäckl ohne Zweife guat.

Vom Burgermoast foit ma no wos ei,
a weng im Stress tuat er scho sei.
De Bürgervosammlunga, so komma sogn,
de tean eam scho a wengerl plogn.
Drum mog er a mehra zsammaleng;
des is am Wittmann Franz na doch scho zweng.
Um an guatn Ruaf vom Christian kümmert a se;
des findt der natürle bsonders schö,
wenn sogor a Kollege vo da Union
um sei Ansehn so besorgt sei konn.
 
 Zur Bürgervosammlung, des is a Pracht,
hätt vorher da Maier Hermann an prima Vorschlog gmacht.
Da Christian hätts, dass waar des Schöna,
für olle Ortsteile s Nötting hoitn könna,
und zwar, wo i mitm Hermann einig bin,
vo fünfe bis um siebne glei do herinn.
Oiso Christian merk da des fürs nächste Moi,
vielleicht werd da Franz mit dir na zfrien a sei !

Wemma des ois so hört, do fragt ma se scho:
A Dreifach-Turnhalle, wer braucht de no ?
D Staudter Henriette is ja gscheid aktiv
und ois Kulturreferentin wirklich vif.
Mitm Hetznegger Hannes hots es gmacht
und d Erotik ins Rathaus einebracht.
Es hänga ja oiwei schöne Buidl drinn,
doch derzeit sans bsonders gelungen, wia i finn.

A Magistratsbesuch macht jatz wirkle Spaß,
do kimmst da fast vor wia im Haus Felicitas.
A Fremda kannt moana garantiert:
De Geisnfelder hamm an Nacktscanner ausprobiert !
Recht schöne Rundunga komma do segn;
Im Treppnhaus herrscht jatz Hochbetrieb desweng.

De Angestelltn, insbesondare d Herrn,
benutzn an Lift jatz gor nimmer gern,
weil jeder liaba sportlich über d Stiagn naufgeht,
so mancha kimmt ins Büro glei z spät.
Ober für d Fitness haut des ganz guat hi,
und da Liftvozicht spart Energie.
Schö san de Buidl, wia i find;
bloß im obern Stock des letzte hint,
des foit a wengerl aus da Reih
und gfoit man net so recht, i sogs ganz frei.

A weng übertriebn is oa Detail a garantiert,
ober des Buidl werd vo de Damen stark frequentiert.
Ja, auf unsara Erdn is hoit hiniedn
da Geschmack geschlechtsspezifisch recht voschiedn.
Und da Gschäftsführer Hannes muaß beizeitn,
seine Damen jatz im Zaum scho hoitn.
Ober insgesamt is de Gschicht net fad:
A so kimmt a Leben ins Magistrat !
A wenn da Bauausschuss jatz scho diskutiert,
dass ma a erotikfreie Werbetofe installiert.
gibts trotzdem gwiß koan Zweife dro,
a weng a Pfeffer ghört ins Rathaus scho.
Ma soi ja ar amoi wos Erfreulichs finna,
denn ernste Probleme gibt's oiwei do drinna,

Des größe Vorhabn, d Umgehungsstraß,
is derzeit ois andare wia a Spaß.
Ma hot gmoant, de waar in truckane Tüacha scho,
do fangt da Schranner Hans auf oamoi s Schiaßn o.
Der sperrt an Burgermoasta bei de Jagdgenossn aus,
dafür wirft n der na s nächste Moi vom Rathaus naus.
Ma seght, es hot in Geisnfeld
"Auge um Auge, Zahn um Zahn" no Gültigkeit.

Worum da Hans ober so stark gegn d Umgehung is,
des woaß ma tatsächlich net so gwiß´,
denn im Wahlkampf, des war echt a Pracht,
hot er no a Pro-Umgehungs-Begehung gmacht,
Doch zwoa Johr später, ohne Spaß,
macht er a Vohinderungs-Begehung gega Straß.

Er hot a gworbn damit, pfeigrod,
dass er koa Frau und a koan Fernseh hot
und sich desweng ois völlig freier Mo
für Geisnfeld restlos eisetzn ko.
De Aussog klingt tatsächlich grod,
wia an Papst sei Begründung fürn Zölibat.
Böse Zungen sogn jatz scho zu dem Foi,
dass da Hans liaba heiratn und an Fernseh kaffa soi,

na foin eam koane soichan Sachan ei,
und des taat für Geisnfeld gwiß besser sei.
A fürn Burgermoasta waars bestimmt a Seng,
vielleicht kannt ma an Zuaschuss gewährn desweng,
Ober des werd gwiß teuer, so derfts ma glamm,
weil de Umgehungsgegner vorwiegnd Junggselln san.
Trotzdem waar do a Frau des Schöna,
na taatns net auf de seltsama Gedanken kemma.

Heut hot ma glesn, da Hans is ja bloß dagegn,
weil a auf d Südumgehung taat wartn meng,
weil ohne dera ja nix mit da Förderung geht.
I woaß net, soi i des glam oder net.
Da Staudter Christian hot scho no a Problem,
und des is a ois andare wia angenehm.
"Bürgersicht.de" , so hoaßt des Gfrett,
des is Pamphlet-Homepage im Internet.
So schlimm, wias do drinn zum Lesn steht,
san de Geisnfelder Verhältnisse wirkle net.

Es gibt hoit Leut, des oafach net glamm,
dass sa se selber direkt kaputt gmacht hamm
und sich politisch ins Abseits hamm manövriert.
Jatz werd hoit elektronisch agitiert.
Des geht bequemerwies no anonym,
und des find i ganz bsonders schlimm.
Ma soit doch Ross und Reiter nenna,
de mir uns ober a so guat vorstein könna.
Der Umgangston macht me scho betroffa;
des hot ma früher bloß kennt vo Pfaffahofa.
Bloß oans is schö dro, wia i woaß,
dass mas hoit net unbedingt ernst nehma muaß.
Bedeutnd angenehmer fürs Rathaus, derf i voron,
is da Schulz Edith sei neua Lodn.
Der is ois Treffpunkt gor net fad,
für de After-Work-Parties vom Magistrat.

Da Gschäftsführer und de zwoat Burgermoastarin
warn a scho bei a ausgiebign Weinprob drinn.
Dabei hamms, so bin i informiert,
fürn Christian sein 60-stn an Wei probiert.
Allerdings während da Dienstzeit geht net vei,
denn des Fatale an dera Sach tuat sei,
dass da Burgermoaster direkt vo seim Büro
den ganzn Kundvokehr genau beobachtn ko.
Er seght wirkle ois, wos bei da Edith laft,
wer wia oft, wia vei und wos eikaft.
Am Christian werds desweng, so glab i gern,
im Büro künftig nimmer langweilig wern.
Langweilig werds ar am Ehrl Erich net,
weil der andauernd auf d Jagd nausgeht.
Da jagdliche Erfolg, so woaß i Bescheid,
steht ober im direktn Gegnsatz zur Häufigkeit.

Seine Spezln behauptn hoit zu dem:
Er schiaßt de länga Zeit danebn !
Da Erich erklärt des ober aso,
dass er gor net in Ruhe schiaßn ko,
weil in seim Revier, ja wohr is gwiß,
da Raith Günther dauernd auf Achse is.
Und taat a Bock amoi passnd steh,
na kimmt da Günther, ja des is schö.
Da Bock haut ab und da Raith is do,
koa Wunder dass ma net schiaßn ko.
Da Erich traut se a gor nimmer recht,
weil a net zufällig an Günther treffa möcht.

Do is bloß guat, des sei is gwiß,
dass dahoam sei Trefferquote besser is.
Do trifft a gscheid, ganz ohne Stuss,
do schafft a zwoa glei auf oan Schuss.
Ober wos d Jagd betrifft, is mir bekannt,
do kimmt a net bloß beim Schiaßn durchanand.
Auf sei Orientierung hot a recht vertraut
und im Revier an schöna Hochstand baut.

Sei Reviernachbar war noch a poor Tog
na ziemle überrascht, ganz ohne Frog !
"Meine Freund", so denkt a, "ja des san Leut,
de baun ma heimlich an Hochstand, a so a Freud.
Ja, soichane Spezln, de san echt net grob,
wo i jatz net amoi Geburtstog hob !"
So hot da Erich, des is a Pracht,
an Waidmannskameradn glücklich gmacht.

Mit soichane Aktiona, so glab es gern,
ko a s nächst Moi wirkle Burgermoasta wern.
Ober beim nächstn Hochstandbau, a jede Wett,
do nimmt a na glei an Raith Günther mit,
weil der jedn Hochstand, so berichtns mir,
und a olle Grenzn vom Revier,
vei besser wia da Erich kennt,
drum waar a da richtige Jagdassistent.
Und hockt a mit aufm Hochsitz, ohne Frog,
na votreibt a künftig gwiß a koan Bock.
Bloß s lange Staadhoitn, des is klar,
foit dem umtriebign Günther sakrisch schwaar.

 

Er is net bloß selber in Bewegung oiwei,
sondern tuat a da große Initiator sei.
"Geisnfeld macht sich fit", war sei Programm,
und heuer, wias ma mitteilt hamm,
kimmt vom Günther da "Bewegungspark".
Ja, seine Ideen im Sport san wirklich stark.
Natürle, so woaß ma a Bescheid,
hot er ois Privatier dafür a massig Zeit.
Er is äußerst sportlich, wia ma hört.
Ma ko bloß hoffa, dass a net no dürrer werd,
denn sunst rutscht a, so befürcht i fast,
irgndwann doch no amoi durch an Gullirost.
D AlterMargit, hamms mir voron,
is bei a Werbefahrt kürzle mitgfohn.

Da Sepp is a mit, wia ma hört,
ois Aufsicht, dass ja nix eikaft werd.
Doch schließle, so komma wirkle sogn,
hot er selber nacha gscheid zuagschlong.
I schatz, dass im Schlofzimmer wieder mehra laft,
hot a Magnetmattn für d Ehebettn kaft
und sogor no dazua, wos ma fast net glabt,
Magnetblattl de ma hinter d Ohrlappal pappt.

 

Obs wos hilft, hot a ma no net voron,
ober wahrscheinle werds a gwiß net schodn,
wobei i allerdings da Moanung bi,
de Magnetblattl ghöratn wo anderscht hi.
A Reisegutschein war ano dabei,
do buacht da Sepp a Fahrt a glei.
Ober noch a poor Tog werd, wia i woaß,
eam de Sach na doch a weng z hoaß.

Er hot hoit a wengerl nochstudiert
und ois Ergebnis de Fahrt na glei storniert.
Wo Tochter doch d Stanglmoaren is,
konn a mit koam andern fuatfohrn, des is gwiß.
Da Sausi Sepp ghört zu de Leut,
de recht gern feiern und wenn, na gscheid.
An Sylvester war a z Woiza beim Bürgerbräu,
da Wirt vo Münster war a dabei.
Do werd natürle wos trunka, wia jeder woaß,
so dass d Erna na schließle hoamfohn muaß.
Doch drent in Feimbo, ohne Schmarrn,
do traut sa se nimmer weiterfahrn,

denn wega da Ilm war dort da Nebe so dicht,
dass höchstns zecha Meter war no d Sicht.
Do sagt da Sepp: "Mach da nix drauß !
Do steig i jatz oafach vom Auto aus
und zoag dar an Weg, i laf voro,
wersd seghn, na pack ma den Nebe scho!"
Ein Mann, ein Wort und so laft er
bis a Oacheberg nacha vorm Auto her.
Ma möchts gor net glamm, dass er schafft
und mit seim Alkohol no so weit laft.
Ober Kondition war do, do braucht net ren,
er is ja siebn Wocha schließle auf Kur fuat gwen.
Und do hot a se so guat dahoit,
dass eam so a Dauerlauf ganz leicht jatz foit.
Und wiar a z Oacheberg na war,
war sei Kopf bestimmt a wieder klar.
Da Königer Helmut und da Robert Schaller
warn am Christkindlmark fei echte Knaller.
De hamm an Gschäftssinn, do sagts sie,
des san wirkliche Verkaufsgenie.
De zwe hamms nämle tatsächlich gschafft
und de ganzn Kripperl vom Fuchs Helmut vokaft.
Fürn Königer is erstaunlich, i sogs ganz frei,
denn war gor oanzigs Toscana-Kripperl mit dabei,
denn ma woaß, dass bei eam sunst nix anders laft
und er bloß Toscana-Stil baut und vokaft.
I persönlich glab ja und tua mas a aussogn traun:
"A Holledauer Haus kannt er bestimmt net baun !"
Angeblich hot ar an Fuchs ja scho instruiert,
dass a heuer a Toscana-Kripperl produziert.
Allerdings bezeifet I do scho fast,
ob so a viereckats Kistl ois Kripperl paßt.
Vom Helmut hob i euch vorigs Johr vozeiht,
dass a se oiwei ganz früah und pünktlich dahoam eisteit.
Es wird euch wundern, wenn i jatz vorot,
dass se des inzwischn fei ganz ganz schö gwandlt hot.
Noch de Sitzunga werds jatz wieder spät,
bis da Helmut na endlich haomzua geht.
Und er erklärt des tatsächlich so,
dass er nimmer eher hoamgeh ko,
bevor sei Töchterl net endlich schlaft,
und des hätt eam sogor sei Frau ogschafft.

I hob ober ghört und sogs ganz laut:
Des hot a vom Ehrl Erich bloß ogschaut,
denn der, wia i euch mitteiln ko,
begründet sei späts, Hoamgeh nemle grod aso !
Wenn i d Frau sei taat vo dene zwe,
i glab de Kameradn helfat e,
I taat Kinder um siebne scho as Bett,
na hättns koan Grund zum Fuatbleibn net !
Vom Schaller Robert hör i grod,
dass der bei Evas sei zwoate Hoamat hot.
Er derf, und des is bsonders schön,
inzwischn a d Wirtsleut dort scho votren.
Des is natürlich a Super-Job;
i woaß, weil es z Pinat so ähnlich hob.
D Herrschaft über die Zapfhähne hot ma do,
des is direkt paradiesisch, vostehts me scho.
Da Alter Christian und da Fuaßn, so hör i ren,
hamm an Kooperationsauftrog ghot, beim Karl, beim Schön,
wobei da Alter fürn Antennenbau zuaständig war
und da Fuaßn fürn Grüstbau, des is klar.
Es hot a ois klappt, des sei is gwiß,
bis da Christian beim Grüst durchbrocha is.
Er sagt natürle: "So is recht !
Do war bestimmt da Grüstlodn schlecht !"
Doch da Fuaßn Karl sagt: "Des is klar,
da Christian is ganz oafach zschwaar !"
Vo dene Erklärung is koane schlecht,
irgnwia hamms vielleicht oi zwe recht,
und d Entscheidung drüber überlass i drum
ganz oafach dem geneigtn Publikum.
So, des wars jatz, meine liabn Leut,
des is scho gwen, mei Red für heut.
Drum hör i a glei wieder auf
und wünsch am Starkbierfest no an schön Volauf
I kriag a vo da Redarei
schö langsam a ganz a truckas Mäu.
Drum nehma jatz oi mitanand
unsare Salvatorkrüagl glei in d Hand.
Denn es is wirkle an der Zeit
Für a kräftigs Prosit der Gemüatlichkeit !

 

Zurück