Veranstaltungen
Geisenfeld-Online

Kommunalpolitiker "sauber derbleckt"

Fastenrede von "Bruder Barnabas" alias Sepp Meyer

Grüaß euch Gott mitnand, liabe Salvatorgemeinde,
des starken Paulaners treue Freunde.
Es is a wieder heuer recht angenehm
in da Helmut-Königer-Hall in Nottingham..
Des Starkbierfest vo unsrer FW
werd a heuer ganz gwiß wieder schö.
Da Zuaspruch is groß, des wissts ja scho,
so dass de Halle a leicht voiwern ko.

Es is jatz wirkle wohr, wos i euch sog:
Da Helmut hot im Vermietungsvortog
ois Zusatz, wia i im Bilde bin,
de foignde Bestimmung drinn:
Da Mieter muaß oi Johr wia heuer
de Halle ausrama für unser Starkbierfeier,
so dass für des schöne Fest ganz gwiß
da Fortbestand langfristig gsichert is.

Des Weiterbesteh ghört a sichergsteit
fürs schönste Starkbier-Event vo Geisnfeid.
I glab, dass i nix Vokehrts ofang,
wenn I mi beim Helmut und seim Mieter dafür bedank.
I glab, dass jeder sowos gern hört,
und an gscheidn Applaus vo euch waars a gwiß wert.

Ois Fastnprediger bin i wieder engagiert
und hoff, dass euch mei Red a weng amüsiert.
Es gibt wieder etliche nette Gschichtn,
de i zu euerm Vognügn konn berichtn,
denn do braucht ma uns gor nix vormacha,
über a Missgschick vo andare komma oiwei lacha.

Bloß schod is, dass i d Union
scho wieder net begrüaßn konn.
Vorigs Johr hamms net derfa zwengs da Woih
Und desmoi sans beleidigt oi !
Genauso wia a de USB;
eigntlich soiat ma do drüber steh.
Ois oanzigen Schwarzn hob I an Kuffer erblickt,
wahrscheinlich hamms an Erich ois Spion hergschickt.
Ober Erich, sei ma fei jatz net bös,
du bist do, und mi gfreut fei des.

De Kommunalwahln san ja für d SPD 2
letzts Johr ois andare gwen wia schö.
Des hot ma scho Jahrzehnte nimmer kennt:
Sie san im Stadtrat nimmer existent !
Und s "Bayanada", eaner Politlokal
is a längst gschlossn, klara Fall.
Noch de Votriebna, ja ma möchts net fassn,
hamm jatz a d Votreiber scho des Schiff volassn.
Ja, wia komma se a so vorenna ?
Des komma scho Selbstzerfleischung nenna !

Dafür is d USB, do braucht net ren,
für s erschte Moi scho guat votretn.
Sie stelln sogor an Burgermoasta.
Ihr wisst ja oisam: Staudter hoaßt a !
Er hots net oiwei ganz leicht, wiar i finn,
denn sei Henriette is ja a im Stadtrat drinn.

Und böse Zungen hört ma sogn,
dass ma oft net recht unterscheidn konn,
obs ois Frau vom Burgerrmoasta fungiert
oder eher ois Frau Burgermoasta amtiert.
Es hamm ja vor da Woih scho manche gsagt:
"Mit da Entscheidung is ma desmoi net plagt,
denn ganz wurscht, ob ma Bachhuaba oder Staudter weiht,
mir kriagn auf jedn Foi a Burgermoastaren in Geisnfeid !"

D Henriette brauchat, so behauptns no,
nebam Christian im Rathaus ihr oagns Büro.
Wobei i allerdings zu dem Ergebnis kimm:
Des is doch scho a wengerl übertriebn !
Manche USB-ler tuats angeblich schlaucha,
de taatn nemle eher an Doktor braucha.
Vo de vein Radltourn, i möchts fast glamm,
soin manche an wundn Orsch scho homm.
Wemma se aufm Radl a so obstrampfen muaß,
do komma scho an Wolf kriagn, wia ma woaß.
Des is obern et ois, denn außerdem
hamms trotz Radlfohrn a noa Gwichtsproblem,

denn s Ziel vo a jedn Radltour
is grundsätzlich a Biergartn nur.
Und desweng, ja des glab i scho,
setzn manche jatz an Bierbauch o.

Ober ma woaß ja, wemma in Politik eisteigt,
dass ma na meistns boi zum Dickwern neigt.
Do konnst die Figur hoit boi vogessn
vor lauter Einladunga und Arbeitsessn.
Wenns d des so betrachst, na kimmst leicht drauf:
Unsare Politiker opfern se für uns auf !

I muaß dabei ober zuagebn unterdessn:
In meiner Stadtratszeit hob i a gern gessn !
Gscheid ogwohnt hob i ma des domois scho,
so dass es bis heut oiwei no ganz guat ko.
Hoffma bloß, dass da Christian ois Burgermoasta
a d Letzt net a werd so a Kund, a foasta.

Natürlich waars hoit ganz bsonders schod,
wenn unser Claudia Jung desweng ausanandgeh taat.
Ober i glab, de Claudia woaß des scho,
wia ma se trotz Politik d Figur dahoitn ko.
Von de Freien Wähler komma sogn,
de hamm se a Vojüngungskur jatz unterzogn.

Letztn Montog hamms an neua Vorstand gwoiht
und gewisse Weichn scho für Zukunft gsteit.
Da Ehrl Erich is jatz ganz vorn dro,
er is a gwiß dafür da richtige Mo,
denn da Erich is ja wirkle vif,
der kriagt a Prozentrechnung no in Griff.
Sei Lapsus vom Unsinnign Donnerstog
war a gfundns Fressen fürn Kohlhuaber, ohne Frog.
Ober i gibs jatz zua, ganz ungeniert,
mi hot der Bericht a ziemlich amüsiert.

Ober soichane Gschichtn ghörn doch ohne Frog
zu a echtn Faschingssitzung am Unsinnign Donnerstog !
Zu dem Thema möcht i grod no sogn:
Ma soits nächsts Johr im Fernseh übertrogn.
Es ghörat unter foigndes Motto gsteit:
"Hallertauer Faschingsgaudi ausm Rathaus Geisnfeld !"
Doch zruck zur Neuwoih; i ko euch voron:
Da Alter Christian is zwoata Vorstand won.
Er hot von da Chefetage vo da FFW
jatz gwechslt ins Päsidium der FWG.

I glab do braucht net weiter ren: 4
Er möcht in d Fuaßstapfn vom Onkl Josef tretn.
I glab a echt, er passt dazua,
zumindest hot a fast de gleiche Frohnatur.

Und in da Politik, des is gwiß wohr,
do brauchst scho oft a weng Humor
Ober beim Alter Sepp, do wissts Bescheid,
hot se in dera Hinsicht no nia wos gfeit.
Er hot se ja, so hört ma sogn,
letzts Johr a gscheide Blessur zuazogn:
Mit seim Radl war da Josef auf da Streck
und zwar aufm sogenanntn Promilleweg,

der wo hintn rum vom Zellerer Wirt
in Richtung Scheuerer Siedlung führt.
Do wenns mitm Gleichgwicht a wengerl feiht,
na seng de zum Glück gwiß net vei Leut.
Da Sepp strampfet hoam, ganz schö erledigt:
Er war hoit a weng augustinergeschädigt.
Und aufara Moi, ja des war dumm,
foit des Radl mitsamt am Josef um.

Gscheid hotsn hipelzt, hör i ren,
a langwierige Rippnprellung is s Ergebnis gwen.
Ja, des war wirkle koa Genuss,
ober er fohr neuerdings ganz vei mitm Bus
und desweng, ja des is hoit schlecht,
kimmt a mitm Radl anscheinend nimmer zrecht.
Ois Burgermoasta, ja des derfts ma glamm,
hot a scho gschaugt, dass seine Leut wos z lacha hamm.
Er is tatsächlich, wos sagts do,
mit zwoa voschiedne Schuah glei ins Büro;
da oane schworz, da ander brau,
des Buidl war fei echt a Schau.

Ober auf de Weis konns oam scho gelinga,
a weng a Heiterkeit ins Amt zum bringa.
De hot ja eh gscheid obgnomma, des is gwiß,
seit da Sause nimmer im Stadtrat is.
Da Sepp hot scho vo Zeit zu Zeit
ara wengerl gsorgt für Fröhlichkeit.
Ober jatz, wia i erfahrn no hob,
gibt a se bloß mehr mit bsondare Größn ob.

Auf überörtliche Sitzunga is er votren, 5
mit Aiwanger und Pauly, hör i ren,
wobei er angeblich an bsondern Droht
zur schöna Gabriele Pauly hot.

Wenn de a manchmoi a weng seltsam redt,
oans muaß ma zuagebn: Weid is net !
Es woit am Sepp fei fast gelinga,
sie zum Starkbierfest heut herzumbringa.
Sei Einladung woits fei echt onehma,
ober es is ihra hoit wos dazwischnkemma.
Ober da Aiwanger is do, ja des is schö;
er is immerhin da Obama von da FW.
Sowos tuat bloß am Sausi gelinga,
so prominente Gäste zu uns her zum bringa.

Do hoff i jatz natürle hoit,
dass am großn Vorsitznden unser Bierfest gfoit.
Weil da Sause ja nimmer zum Stadtrat muaß,
geht a dafür jatz zum Fitnes, wia i woaß.
Wahrscheinlich macht a sei Fitnes-Programm
beim Birnthaler s Zei drauß, tua i glamm.
Sei zwoata Fitnesraum, ohne Flax,
des is am Rathausplotz drobn as "Max".

Do trifft a se mitm Fröschl Sepp und Breitner Peter,
wia er zwoa Ex-Räte, des woaß jeder.
Do werd na d Rathausarbat diskutiert
und über d Lokalpolitik philosophiert.
Do sitzns beim Bier oi drei bequem
und lösn rein mündlich a jeds Problem.
De "drei Wirtschaftsweisn" kannt mas nenna
oder "Elder Statsmen", des klingt no schöna.
I konn da Geisnfelder Administration
aus dem Grund bloß ganz dringend rotn:
Setzt euch dazua und lusts guat her,
na machts ganz sicher koane Fehler mehr.
Allerdings technisch hot da Sausi net des Gschick
wia in da Lokal- und Wirtschaftspolitik.

Bei da Einweihung vom Evas, so hör i ren,
war a s erscht Moi mit seim neua Auto votren.
Bei dem Bolidn, do brauchts koa Gred,
is d Ausstattung natürle a komplett,
Des is ja ois eigntlich ganz famos,
doch aufra Moi geht d Alarmanlage los.

D Liachter blinkn und d Hupn plärrt, 6
des hot ma in fast ganz Geisnfeld ghört.
Da Sepp und d Marlene stehnan vorm Karrn,
wia ma des ausschoit, hamms leider net erfahrn.
Zum Glück is hoit da normale Lauf:
Noch a gwissn Zeit hörts vo selber auf !
Und geht da Alarm ar a lange Tour,
wenn Battrie laar werd, na is a Ruah.

Ober i vorot am Sepp, bevors eam nomoi schlaucht,
dass ma do eigntlich Tür bloß aufspirrn braucht.
Vom Königer Helmut komma sogn,
der hot ara gscheids Problem mit seim Wogn.
Der hot an Sound, der is wos wert,
so dass man vo Geisnfeld bis auf Nöttig hört.
Wenna jatz spät hoamkimmt, hör i vozeihn,
muaß a beim Klausner-Weiher scho an Motor obstein,

weil de kloa Sophia, des waar fad,
wega dem Radau vom Auto wach wern taat.
Übrigns seght mas am Helmut fei gor net o,
wos er für a scharfa Hund sei ko.
Bei da FW-Vosammlung, so komma sogn,
do hot a scho kräftig vom Leder zogn.
Da neue Burgermoasta is do bloß
a Eventmanager und a Leichtmatros.

Dabei hot d FW, wia i im Bilde bin,
mit da Gerda selber a Eventmanagerin.
Und mitm Leichtmatrosn, so glab i nur,
moant a gwiß net am Staudter sei Figur,
denn dera noch, a klare Gschicht,
hot da Christian sicher scho a Gwicht.
I sog dazua jatz nimmer vei mehra,
bloß bei de Freia Wähler gibt's fei ar an Lehra !
Ja, soiche Töne, do lieg i net vokehrt,
hot ma seit Spreng Wolfgangs Zeitn nimmer ghört !
Des trauat ma oam gor net zua, pfeigrod,
der mittn bei da Nocht in d Apothekn foht,
weil sei Töchterl d Wind a wengerl plogn.
Do konn i eam jatz fürs nächnst Moi sogn:
Wenn d Sophia wieder d Scheaß amoi zwicka,
na braucht de dei Frau net in d Apothekn schicka.

Stott Schoaßtropfa kochst an Kümmetee, 7
na genga d Wind bestimmt genauso schö.
Vom Alter Sepp seids ja informiert,
der is beim Bus Stanglmayer ganz stark engagiert.
Sogor wiar a Burgermoasta gwen is no,
war er an diamoi Busbegleiter scho.
Des is a Job, wia jeder woaß,
wo ma d Fahrgäste a bediena muaß.
Do sitzt, wia i im Bilde bin,
im Bus da Stadtarbeiter Kreis Schorsch drinn.
Der seght an Sepp und plärrt a scho:
"Ja do vareck, da Chef is do !
Do gfreuts me glei no bessser do herinna;
da Burgermoasta derf me heut bediena !
Fürs erschte bringst ma jatzat glei
an Speze geng mein Durscht vorbei !"
A weng später hot a na Würschtl bsteit,
na an Kaffee, hamms mir vozeiht.
An Kuacha, a Wurschtsemme und no mehr,
des gfreut an Sepp natüle sehr.
Do komma sogn, dass eam pfeigrod
da Schoßl auf Trab gscheid ghoitn hot.
Vor de nächstn Reisn, ma konns leicht fassn,
hot se da Sepp Passagierlistn oiwei zoagn na lassn.
Da Schäch Sepp, wia ma feststelln ko,
is a bsonders rücksichtsvoller Ehemo.
Hot er zvei intus und kimmt hoam recht spät,
na nächtigt a in seim Schlofzimmer net,
weil a den Bierdunst und sei Schnarcharei
seiner Gattin na net zuamutn wei.
Do schleicht a se na jedsmoi schö stad
zu seiner Liege in seim Hallnbad.
Kürzle war a wieder amoi drunt;
er hot scho gschlaffa a poor Stund.
Doch Blodern druckt; da Sepp wird wach
und moant, er is in seim Schlafgemach.
Er geht im Finstern de sunst gwohnte Streck:
Do tuats an Patschara, und da Sepp war weg !
Des war für eam net grod des Schöna,
do hätt a im Schock ja leicht dasaufa könna.

Auf jedn Foi, do braucht net ren, 8
is er auf oan Schlog na stocknüachtern gwen !
Do komma eam jatz bloß dringend rotn,
ob a se net an harmlosern Ersatzschlofplotz suach konn.
A richtiger Rennfahrer is ganz ohne Flax
mit seine Baubusse da Hechinger Max.
Zur Delegiertnvosammlung für d Europawoih
Do fohrt a hi. Da Bus war voi
mit acht weitere Größn vo da FW,
da Sause war a mit von da Partie.
Da Bus war scho a ziemlich oida Karrn,
oba 170 is da Max leicht gfahrn.
Er lasst hoit d Sau so richte raus,
do hauts eam hint an Reifn naus.
Da Sause hot plärrt: "Jatz geht's dahi !"
Doch da Max, wia i im Bilde bi,
fangt des schwanknde Schiff no ob ganz schö
und kimmt aufm Standstreifn an zum Steh.
Da Reifn is hi, des war a Frust,
doch zum Wechsln hamms oisam koa Lust.
Auf da Standspur is na, ohne Schamrrn,
da Max auf da Felgn hoit weitergfahrn,
guate 5 Kilometer, ja des hoitst net aus,
bis Inglstodt-Nord, do fohrt a raus.
Da Sause sagt, des war genau,
wia beim Bullnreitn in da Westernschau.,
Dass es gscheid durchgschüttlt hot, hot er net gschadt !
S nächst Moi teats wechsln, is da Reifn platt !
Da Greller Hans vo Münster drauß,
kennt se in Landwirtschaftsfragn bestns aus.
Seit neuastm is er ja sogor
jatz a landwirtschaftlicher Fernsehstar !
Bei "Unser Land", hot, wia ma hört,
da Hans an Unterschied erklärt,
zwischn am Ochsn und am ganzn Stier,
des foit eam ois Ökonomen gor net schwer.
"Da Stier", sagt a, "is da Mo vom Rind",
a klare Erklärung, wia i find,
"und da Ochs, des is a net des Neua",
sagt a, "is a fast a Stier, bloß ohne Eier !"
De Aussog, so glab i garantiert,
hamm olle Zuschauer gwiß kapiert !

Da Bayerl Helmut, so hör i ren, 9
is mit Hofer Helmut beim Schifohn gwen.
Da Winter Fritz war a dabei,
in Karditsch drinn sans gwen oi drei.
In oller Früah, hamms ma no voron,
sans oamoi weiter auf Reinig gfohn.
Hintn drinn, es war no finstare Nacht,
hot da Fritz a weng Augnpflege gmacht.
Do spannt da Bayerl auframoi,
eanare Scheinwerfer müassn recht dreckat sei,
denn s Liacht war nimmer bsonders hei.
"Jatz hoit ma", sagt a, "und putzns schnei !"
Da Hofer und er steing zur Reinigung aus,
do kimmt da Fritz vom Schlof a drauß.
"Mir hamm ghoitn", denkt a, des is schö,
do ko i glei amoi zum Bisln geh."
Er volasst a sofort deann an Wogn,
damit a se Erleichterung voschaffa konn.
De andern zwe steign ei und fohrn davo;
da arme Fritz steht fast im Hemad do !
Koa Geld dabei, ja des is klar,
weil sei ganz Graffe im Auto war.
Do kimmt eam na hoit no in Sinn:
"Mei Handy is ja a im Auto drinn !"
Drum hot a se vo am Femdn oans zleichagnumma
und ruaft na o sei oagne Nummer.
Des Telefon hot a im Auto gläut,
ober ohne Erfoig, woaß i Bescheid,
denn da Bayerl sagt zum Hofer glei:
"So wichtig werd des Gespräch net sei,
und da Fritz der schlaft do hint so schö,
den weck ma jatz net auf oizwe !"
Und so sans weitergfohn de Fretter
scho no an etliche Kilometer !
Doch schließle gspannans nacha scho:
Ja vareck, da Fritz is nimmer do !
Des war natürle a schöna Mist,
denn eanan Hoitepunkt hamms a nimmer gwisst.
Und so is nomoi a schöne Zeit voganga,
bis den volorna Passagier wieder ei hamm gfanga.
Der war dawei scho hoibat dafrohrn
und hot scho sei ganze Farb volorn.

Do hoaßt de Moral von dera Gschicht: 10
Geh ohne Obmeldn zum Bisln nicht !
Und ganz bsonders wichtig tuat des sei,
bist beim schnella Bayerl du dabei !
Da Riadara Sepp, so hör I ren,
is kürzle im vodientn Urlaub gwen.
Wia er na obnds zum Essn geht,
do frogns n am Empfang so blöd:
"Smoking or No Smoking, Sir ?"
Do moant da Josef, wia I hör:
"Bei mir do hoaßts, ,No Smoking' glei,
denn an Smoking hob I koan dabei !"
Wenn i des so hör, glab i pfeigrod,
dass er im Englischunterricht net aufpasst hot.
An Sepp plagt übrigens scho gscheid,
des Mitleid mit de kranka Leut.
Über Krankatn redst mit eam besser net,
weil eam sowos sakrisch nahe geht.
Vozählst eam wos, na werd eam bang,
do werd a praktisch glei selber krank.
Des is, a so hamms mir bericht,
an diamoi direkt a seltsame Gschicht.
Wenn im Fernseh, des is fei wohr bestimmt,
a Sendung über Frauenleidn kimmt,
na tuat am Sepp danoch, des is net schö,
tatsächlich sei Unterleib a jeds Moi weh !
Sepp bleib ruhig, denn ganz ohne Liagn,
a so a Krankhat konnst ganz gwiß net kriagn !
Vo da Steinberger Evi bin i informiert,
de hot Kalenderaufzeichnunga gführt,
wenn ihr Sepp zum Wirt a Zell nausgeht,
doch inzwischn is ihra des scho zblöd.
Auf Grund der großn Häufigkeit
schreibts jatz bloß mehr auf, seit kurzer Zeit,
wenn da Sepp dahoam bleibt, weils pfeigrod
auf de Weis vei weniger Arbat hot !
Ois Resumee komma do zsammafassn:
Ma muaß se hoit de Umständ opassn !
An Gigl Fons, woaß i Bescheid,
hot s Christkindl mit am Navi erfreut.
In des Ding is er jatz so vernarrt,
dass a tatsächlich nimmer ohne fahrt.

Sogor a Ernsgodn in d Arbat, ma möchts net fassn, 11
mog a se jatz täglich vom Navi leitn lassn.
Dass a nimmer woaß, wias zu seiner Sporkass geht,
des sei, des glab i wirkle net.
I moa, dass i eher zu dem Ergebnis kimm:
Er is hoit voliabt in de sexy Frauenstimm !
Übrigens ghörts jatz scho amoi informiert,
dass hauptsächlich da Fons des Fest organisiert.
Er hot zwar obdankt ois Vorstand vo da FW;
Er war vielleicht amtsmüad, ja ma kannts vosteh.
Ober s Starkbierfest, wia i im Bilde bi,
vobleibt a weiterhin unter seiner Regie.
Do samma gwiß froh oi mitanand,
weils wahrscheinle koana besser kannt.
Und ois Starkbierchef arbatn, is a gwiß koa Fehler:
Es gibt kam an wichtigern Postn bei de Freien Wähler !
A kloana Applaus für eam waar jatz net fies,
denn den hot a se vodeant, ganz gwiß !
Ma seghts eam no gor net o, gwiß wohr,
oba da Fuaßn Karl werd a 50 Johr.
Do moana jatz manche scho zwengs dem,
er derfat sei Gschäft a boi übergebn.
Weil ma do eam eh bloß mehr seltn entdeckt,
und praktisch grod no an Johannes arbatn seght.
Ober da Karl werd se wahrscheinlich sogn:
Oana muaß arbatn, da ander d Voantwortung trogn !
Wobei des zwoate natürle vei schwara geht,
und des dakraft da Johannes gwiß no net.
Desweng nimmt da Karl hoit sicherlich
no länga de schware Last auf sich !
Beim Schranner Hanse glabt ma glei,
der muaß a bsonders fleißiga Stadtrat sei,
weil ma eam, des habts gwiß scho entdeckt,
bloß mehr mitm Aktnkoffer lafa seght.
Do komma sogn: Guat macht se des,
so a Koffer wirkt total seriös !
Doch aus sichara Quelle bin i unterricht,
beim Hans, do täuscht a weng de Gschicht.
Aktn san koa drinna, glabts es mir;
do drinn is nix anders ois wia a Bier !
I moa, dass er net ganz unrecht hot,
denn Nahrung fürs Hirn, de braucht ein Rat !

Da Helmberger Helmut, der is a s Schau, 12
der kocht a Zwoa-Personen-Menü für eam und d Frau.
Wobei se des, hamms mir vozeiht,
jedsmoi na ungefähr a so darsteit:
A Fleisch, des is ja gwiß nix blöds,
gibt's natürle do hoit für a jeds.
A Stückerl Putnbrüsterl mit 100 Gramm,
des is hoit d Eiweiß-Ration für d Mamm.
Fürn Papp is a wengerl mehra gsund,
a Schweinshax mit ungefähr zwoarahoib Pfund.
Do ernährn sa se oi zwoa net schlecht,
de Aufteilung is doch voi gerecht.
Zumindest hör i oiwei ren:
Bei de oidn Baurn is früahras grod so gwen.
Richtung Nötting habts es scho gseng ganz gwiß,
dass da Klausner Weiher jatz wieder a Weiher is.
De Firma Kneidl, ja des war a Pracht,
hot aus dem Sumpf wieder a Gewässer gmacht.
Allerdings a weng unterschatzt hamms de Sache scho,
denn da Bagger is eana noch unt davo.
Da Fahrer muaß schnei Reißaus nehma,
er is grod no ohne Taucherausrüstung außakemma.
Da ganze Fuhrpark vom Kneidl ruckt nacha aus,
mit knapper Not bringas den Bagger grod no raus.
Da Kurt überlegt scho fürs nächste Moi,
ob a se net an Schwimmbagger oschaffa soi.
Ober wenns zum nächstn Rama vom Klausnerweiher
wieder genau aso lang dauert, wia bis heuer,
na konnas voschiabn de Investition
und des getrost für sein Urenkl aufspon.
Ganz dringend hamms ma ans Herz glegt no,
ob i an Daniel Patrick erwähna ko.
Sei "Evas" is schö, hamms mir vozeiht,
wobei ober no ganz wos Wichtigs feiht:
Fast a Todsünd in Bayern, wia i moa,
denn Masskrüag gibts tatsächlich koa !
Da Sause war ja direkt gschockt,
wia er des gspannt hot, hot a gsogt.
I hoff, dass da Patrick des jatz woaß,
dass a den Mangl umgehend obstelln muaß !
So, des wars jatz, meine liabn Leut,
des is scho gwen, mei Red für heut.

Drum hör i a glei wieder auf 13
und wünsch Starkbierfest no an schön Volauf
I kriag a vo da Redarei
Schö langsam a ganz a truckas Mäu.
Drum nehma jatz oi mitanand
unsare Salvatorkrüagl glei in d Hand.
Denn es is wirkle an der Zeit
Für a kräftigs Prosit der Gemüatlichkeit !